- 依賴於：
rime/rime-cantonese - 呢個補丁將
jyut6ping3*.dict.yaml嘅詞句轉換成其他主流拼音系統，方便唔係用開「粵拼」嘅人用RIME，同埋學習用「粵拼」打字。 - 本方案唔係rime-cantonese嘅分歧拼音系統方案，而只係一個幫助大家學習「粵拼」嘅教育工具。所以用呢個補丁嘅時候係會預設顯示該詞嘅正確粵拼，而唔係分歧系統之下嘅拼音。
- 長遠請考慮轉用香港語言學學會嘅粵語拼音方案（「粵拼」），一嚟科學，二嚟貼近國際音標，三嚟大部分嘅現代粵語資源都係用「粵拼」標音。如果閣下希望同本地粵語文化接軌，請轉用粵拼。
- 呢度嘅程式碼係都以補丁方式實現，唔會影響其他輸入法檔案。
| 拼音系統 | 「翠」 | 「獎」 | 「粵」 | 「花」 | 常見於（純粹主觀感覺） |
|---|---|---|---|---|---|
| 嚴式國際音標 | t͡sʰɵy | t͡sœːŋ | jyːt̚ | faː | 語言學研究 |
| 粵拼 | ceoi | zoeng | jyut | faa | 現代學術資料，社羣粵語資料，字典 |
| 耶魯拼音 | cheui | jeung | yut | fa | 上世紀學術資料，Gboard等輸入法 |
| 教院拼音 | tsoey | dzoeng | jyt | faa | 香港教育局教材 |
| 劉錫祥方案 | chui | jeung | yuet | fa | 「網上廣東話輸入法」，面向外國人嘅粵語教材 |
| 黃錫凌方案 | tseue | dzeung | yuet | faa | 《粵音韻彙》 |
| 饒秉才方案* | cêu | zêng | yud | fa | 《廣州音字典》等大陸著作 |
*呢個方案太過不規則，用埋哂啲奇怪符號，所以冇辦法整成補丁。
| 準則 | 粵拼 | 耶魯 | 教院 | 饒秉才 |
|---|---|---|---|---|
| 一個符號對應一個音位 | ✓ | ✗ | ✗ | ✗ |
| 只用鍵盤打得出嘅英數字 | ✓ | ✗(聲調) | ✓ | ✗ |
| 符號符合大衆讀音 | ✓ | ✓ | ✓ | ✗ |
| 反映IPA音位 | ✓ | ✗ | ✗ | ✗ |
歸納自：劉邦後代（2020）。《點解要用粵拼，唔用其他粵語拼音方案？》。jyutping.org。（詳見：https://www.jyutping.org/blog/scheme/ ）
如果睇完以上嘅簡介，閣下已經決定咗要學習「粵拼」，但係覺得無從入手，噉喺呢度我提供咗幾個過渡方案，俾閣下用住熟悉嘅拼音嚟用RIME先。選字表上面會顯示正確嘅粵拼，方便大家對照讀音。
如果係學習上遇到啲咩嘢困難，歡迎加入我哋嘅Telegram羣組，入面有大量嘅粵拼專家，「唔識教到你識」爲止。
當你對自己嘅粵拼有信心嘅時候，就可以參考呢度嘅方法，將補丁移除，體驗中州韻輸入法嘅完整功能。
GNU較寬鬆公共授權條款（第三版）。詳細條款請參閱LICENSE。